Թվինինգի յուրաքանչյուր ծրագրում աշխատանքներն ու գործողություններն իրականացնելու և վերահսկելու համար ներգրավված են մի շարք առանցքային անձիք և գերատեսչություններ:

1. ԵՄ անդամ պետության ծրագրի ղեկավար

ԵՄ անդամ պետության ծրագրի ղեկավարը բարձրաստիճան պաշտոնատար անձ է, որն ապահովում է բարձր մակարդակով գործառնական երկխոսություն և ինստիտուցիոնալ աջակցություն : Նա ղեկավարում է ծրագրի իրականացումը և օգնում Թվինինգի ռեզիդենտ խորհրդատուին (ԹՌԽ) շահառու երկրում Թվինինգ ծրագրի իրականացման հարցում: Անդամ պետության ծրագրի ղեկավարը շարունակում է աշխատել անդամ պետության գերատեսչությունում, սակայն իր ժամանակի մի մասը (միջինում` ամսական 3 (երեք) օր) հատկացնում է ծրագրի ընդհանուր էության ըմբռնմանը, վերահսկմանն ու համակարգմանը և ամեն 2-3 ամիսը մեկ այցելում է շահառու երկիր:

2. Շահառու երկրի ծրագրի ղեկավար

Շահառու երկրի ծրագրի ղեկավարը հանդես է գալիս որպես անդամ պետության ծրագրի ղեկավարի գործընկեր և, սերտորեն համագործակցելով նրա հետ, շահառու մարմնի կողմից ապահովում է ծրագրի ընդհանուր վերահսկումն ու համակարգումը: Ակնկալվում է, որ նա նույնպես պետք է լինի շահառու երկրի համապատասխան գերատեսչության բարձրաստիճան պաշտոնյա:

3. Թվինինգի ռեզիդենտ խորհրդատու (ԹՌԽ)

ԹՌԽ-ն քաղաքացիական ծառայող է, որը ԵՄ անդամ պետության կողմից գործուղված է աշխատելու շահառու մարմնում առնվազն 12 (տասներկու) ամիս: ԹՌԽ-ն տրամադրում է տեխնիկական խորհրդատվություն, օգնում է շահառու մարմնին և պատասխանատու է շահառու երկրում Թվինինգ ծրագրի ամենօրյա իրականացման համար:

4. Թվինինգի ռեզիդենտ խորհրդատուի գործընկեր (ԹՌԽ գործընկեր)

ԹՌԽ գործընկերը հանդես է գալիս որպես ԹՌԽ գործընկեր շահառու մարմնից և Թվինինգ ծրագրի ամենօրյա իրականացման ընթացքում ապահովում է սերտ համագործակցություն: 

5. Ծրագրերի կառավարման գործակալություն (Գործակալություն)

Գործակալությունը շահառու երկրի վարչակազմի կողմից ձևավորված առանձին ստորաբաժանում է, որը ԵՀ-ի հետ համագործակցելով ապահովում է Թվինինգ ծրագրերի ընդհանուր համակարգումը:

6. Ծրագրերի կառավարման գործակալության պետ  (ԾԿԳ պետ)

Գործակալության պետը շահառու երկրի քաղաքացիական ծառայող է, որը կարևոր դերակատարում ունի շահառու երկրում Թվինինգի աշխատանքները մշակելու և համակարգելու, ինչպես նաև վարչական կառավարման հորիզոնական խոչընդոտները շահառու երկրում կարգավորելու հարցում:

7. Պատասխանատուներ շահառու մարմնից

Ամեն մի շահառու մարմին նշանակում է պատասխանատուներ, որոնք ապահովում են կապը շահառու մարմնի, Գործակալության, ԵՀ-ի ու ԵՄ անդամ երկրում Թվինինգի գործընկերոջ միջև: 

8. ԵՄ անդամ պետության ազգային պատասխանատու

ԵՄ 27 անդամ երկրներից յուրաքանչյուրն ունի ազգային պատասխանատու, ով հադես է գալիս որպես միակ շփման օղակ ԵՀ-ի համար: Այդ պատասխանատուն ԵՀ-ի ու ԵՄ անդամ երկրի միջև Թվինինգի աշխատանքների ներկայացման, մշակման ու համակարգման հարցերով հաղորդակցության հիմնական օղակն է:

9. Եվրոպական հանձնաժողովի կենտրոնական գրասենյակ և Եվրոպական հանձնաժողովի պատվիրակություն

Թվինինգի ողջ շրջափուլի ընթացքում ԵՀ-ն հանդես է գալիս որպես ԵՀ կանոնների ու ընթացակարգերի արդարացի, թափանցիկ ու հետևողական կիրառմանն աջակցող և երաշխավորող օղակ: